മരത്തിന്റെ കഥ

കാറ്റെഴുതിയ ആമുഖം

നിന്നേടത്തുനിന്ന്

ലോകം ചുറ്റിയ മരത്തിൽ

ദേശാടനത്തിന്റെ രഹസ്യങ്ങൾ കൂടുവയ്ക്കുന്നു.

ഒന്നാമദ്ധ്യായം: വിത്ത്

മണ്ണിനുമാത്രം വായിക്കാവുന്ന

ജലംകൊണ്ടു തെളിയുന്ന ഓർമ്മകൾ.

രണ്ടാമദ്ധ്യായം: വേര്

ആഴത്തിന്റെ രഹസ്യത്തെ

കെട്ടിപ്പുണരുന്ന ജീവിതം.

മൂന്നാമദ്ധ്യായം: പച്ച

സൗരമഞ്ഞയുടെ പ്രണയഗേഹം.

നാലാമദ്ധ്യായം: ഇല

ചിറകില്ലാത്തതെല്ലാം ചിതലെടുമെന്ന്

തിരിച്ചറിയുന്ന ഹേമസംക്രമം.

അഞ്ചാമദ്ധ്യായം: ഉടൽ

കാലം വളയിടുന്ന കാതൽ.

ആറാമദ്ധ്യായം: പൂവ്

വസന്തത്തിന്റെ രൂപകം.

ഏഴാമദ്ധ്യായം: കനി

വേനലുമ്മകൾ തുടുപ്പിച്ച മാംസം.