മുന്നേപ്പോലല്ല
പ്രേമത്തിൻറെ മറ്റേ അറ്റത്
ഇപ്പോൾ അവളാണ്,
സൂക്ഷിക്കണം.
വിരസകാമുകവിശേഷവിസ്മൃതികളേ
വിട!
ചൂതുപോലേ
ചുരംപോലെ
ചുരുളിന്നപ്പുറം
രസനിഗൂഢത.
പ്രേമത്തിലവൾ
പ്രേതഭാഷിണി.
പ്രിയാസക്തമർമ്മരങ്ങളേ
പ്രീതിപ്രസരസുഭാഷിതങ്ങളേ
വിട.
മുന്നേപ്പോലല്ലേയല്ല,
സൂക്ഷിക്കണം.
താളത്തിൻറെ മറ്റേ അറ്റത്
ഇപ്പോൾ അവളാണ്.
അലസകാമുകവിലാസലോലങ്ങളേ
വിട!
വഴുതും വാക്കുപോലെ
വഴിഞ്ഞൊഴുകും പുഴപോലെ
വളവിന്നപ്പുറം
ചുഴിയും കയനീലചാരുത.
പ്രേമത്തിലവൾ
സ്വച്ഛന്ദഗാമി.
ഛന്ദോയുക്തതാളസാരള്യങ്ങളേ
ലളിതപദഗദ്യരേഖീയബോധ്യങ്ങളേ
വിട.
ദേശീയതകളേ
കോയ്മകളുടെ കൊടികളേ
വാജീകരണ യുക്തികളേ
കുന്നായ്മകളുടെ
കൂട്ടുത്സവങ്ങളേ
ഭാഷയുടെ അതിരുകളേ...
മുന്നേപ്പോലാകാനാകില്ല.
പ്രേമം
ഇപ്പോൾ അവളാണ്,
രൗദ്ര.
22/4/2018
